Besinnung gestaltet von Frau Sieglinde Ostermeier
zum Lichterzeichen - Schweigegang
am 29.06.2008

Do hob i aba desmoi an schlechtn Dog erwischt, hob i mia denkt, für mein Lichterzeichn-Beitrog. Do kimd doch koana, wenn heid s Endspui is. De oana miassn se eistimma oda vorbereitn oda se mid andere Fans treffa oda Getränke herrichtn oda d Nervn beruhign oda se aufregn - oda bloß gfrein. Und de andan, wo heid do san, ob se drauf konzentriern kena, wos i do erzej. Oiso, brauchad i mi do ned extra plong und extra wos ausdenga, wenn aso koana zuahead.

Aba dann waar i ja grod aso wia de Leid, wo oiwei song, daß unsa Lichterzeichn eh nix huifd, weil des ja oiss scho lang a beschlossne Sach is. Oda de, wo glei scho gwußd ham, daß de Deitschn nia ins Endspui keman.

Jetz ghear i ja grod ned zu den Fuaßboinarrischn und versteh a überhaupt nix davo, aba ma kimd hoid ned aus. Weil ma sovui head und liest und sigd und sovui Leid sich treffan und se midnand für de gleiche begeistern und de gleichn Hoffnungen ham. Und do kon ma drüba denga, wos ma wui - bei soiche Anläss keman Leid zam, de sonst nia zamkema dadn und de Begeisterung steckt o - a bißl sogor soiche wia mi.

Oiso, irgendwia kon ma des doch mid unsere Lichterzeichn-Treffn vergleicha. Do treffan se a jedn Sonntog Menschn, de se sonst oft ned treffan - aba gleiche Sorgn, Ångst, Begeisterung, Hoffnung bringd sie zam und i glaab gwieß, sie bewirkn wos. Und ganz bestimmd bewirkt des midnanda betn wos - außerTrost. Zur Zeit gibds sogor - zwischn de ganzn Fuaßboiberichte - a für unsa Sach etliche Hoffnungs-Liachter. Und vielleicht kenan mia ja vo dene Fuaßboifans no a bißl mehra Begeisterung lerna und s ostecka a.

Vielleicht is ja der Termin heid gor ned so schlecht.

Gschenk

Da Herrgott hod gebn,
wenn i des recht bedenk,
dem Menschn zum Lebn,
de Erdn oid Gschenk.

Des war guada Wuin,
aba wahrscheinle verkehrt,
verkaffa häd ers soin,
gschenkt hod nix an Wert.

Bittgebet

Liaba Herrgott, i bitt di gor schee,
laß des ned so weidageh,
mach de Menschn wieda gscheid,
laß eana no a bissl Zeid,
mach, dass eana d'Aung aufgenga,
lass seng, dass scho am Abgrund stenga,
mach, dass dei scheene Weid erkenna,
lass hoid ned ins Unglück renna.

Laß a mi ned redn nua,
mach, dass i wos dua dazua.

Sieglinde Ostermeier